اپنی چھت، محفوظ چھت پروگرام: 5 لاکھ روپے تک بلاسود قرض دینے کا اعلان

حکومت پنجاب نے صوبے کے بے گھر شہریوں کے لیے “اپنی چھت، محفوظ چھت” پروگرام کے تحت گھر کی تعمیر کے لیے ۵ لاکھ روپے تک بلاسود (انٹرسٹ فری) قرض فراہم کرنے کا بڑا اعلان کیا ہے۔ پروگرام کی افتتاحی تقریب سے خطاب کرتے ہوئے وزیراعلیٰ پنجاب مریم نواز شریف نے کہا کہ اپنا ذاتی گھر ہر انسان کا خواب ہوتا ہے اور یہ منصوبہ غریب خاندانوں کو تحفظ اور سکون فراہم کرے گا۔ انہوں نے حال ہی میں لاہور کے علاقے کاہنہ میں کمزور چھت گرنے کے افسوسناک واقعے پر گہرے دکھ کا اظہار کرتے ہوئے امید ظاہر کی کہ اب پنجاب میں کسی غریب کی کمزور چھت اس کی خوشیاں نہیں چھینے گی۔ اس تاریخی منصوبے کے تحت ۵ لاکھ روپے کا بلاسود قرضہ ۹ سال کی آسان مدت کے لیے دیا جا رہا ہے، جس کی واپسی کے لیے پہلے ۳ ماہ تک کوئی قسط ادا نہیں کرنی ہوگی، جبکہ بعد ازاں صارفین کو ماہانہ صرف ۴ ہزار ۷۰۰ روپے کی انتہائی معمولی قسط ادا کرنا ہوگی۔ مریم نواز کا کہنا تھا کہ حکومت کا بنیادی مقصد عوام کو باعزت رہائشی سہولیات فراہم کرنا ہے اور صوبائی حکومت ایسے عوامی فلاح و بہبود کے منصوبے جاری رکھے گی۔