وزیر اعلیٰ کے پی سہیل آفریدی، جنید اکبر اور عبدالغنی آفریدی کیخلاف اشتہاری قرار دینے کی کاروائی شروع

اسلام آباد کی انسدادِ دہشت گردی عدالت (ATC) میں مارگلہ پولیس اسٹیشن میں 26 نومبر کے واقعات کے سلسلے میں درج مقدمے کے تحت مطلوب ملزمان سہیل خان آفریدی، جنید اکبر اور عبدالغنی کے خلاف اشتہاری قرار دینے کی قانونی کارروائی کا آغاز کر دیا گیا ہے۔ پولیس کی جانب سے عدالت میں جمع کرائی گئی رپورٹ کے مطابق، عدالت کے 23 جون 2026 کے حکم پر ملزمان کے ناقابلِ ضمانت وارنٹ گرفتاری حاصل کیے گئے تھے، تاہم تمام تر کوششوں کے باوجود ان وارنٹ پر عمل درآمد ممکن نہیں ہو سکا۔ رپورٹ میں واضح کیا گیا ہے کہ وارنٹ کی عدم تعمیل کے بعد ملزمان کے خلاف ضابطے کے تحت اشتہاری کارروائی شروع کی گئی ہے اور یہ عمل مکمل ہوتے ہی ضابطہ فوجداری کی دفعہ 173 کے تحت چالان عدالت میں پیش کر دیا جائے گا جو کہ اس وقت تیاری کے آخری مراحل میں ہے۔ ڈی آئی جی اسلام آباد کی رپورٹ میں یقین دہانی کرائی گئی ہے کہ کیس کی کارروائی اور ملزمان کی گرفتاری کے لیے پولیس کی کوششوں میں کسی بھی سطح پر کوئی غفلت یا تاخیر نہیں برتی گئی۔