عالمی منڈی میں قیمتیں بڑھنے سے ملک میں پیٹرول اور ڈیزل مہنگا ہونے کا خدشہ

عالمی مارکیٹ میں پیٹرولیم مصنوعات کی قیمتوں میں نمایاں اضافے کے باعث پاکستان میں پیٹرول اور ڈیزل کی قیمتوں میں بڑے اضافے کا امکان ظاہر کیا جا رہا ہے، جہاں ہائی اسپیڈ ڈیزل کی قیمت میں 40 روپے 75 پیسے اور پیٹرول کی قیمت میں 8 روپے فی لیٹر تک اضافے کی توقع ہے۔ مارکیٹ ذرائع کے مطابق، عالمی منڈی میں پیٹرول کی قیمت 10.23 ڈالر کے اضافے سے 88.53 ڈالر سے بڑھ کر 98.76 ڈالر فی بیرل ہو گئی ہے، جبکہ پریمیم ملا کر یہ قیمت 109 ڈالر 74 سینٹ تک پہنچ چکی ہے، جس سے پیٹرول کی ایکس ریفائنری قیمت 200 روپے سے بڑھ کر 210 روپے ہو گئی ہے۔ دوسری جانب، عالمی مارکیٹ میں ڈیزل کی قیمت بھی 20 ڈالر کے بڑے اضافے کے ساتھ 120 ڈالر سے بڑھ کر 140 ڈالر فی بیرل ہو گئی ہے، جس کے باعث مقامی سطح پر ڈیزل کی ایکس ریفائنری قیمت 226 روپے 58 پیسے سے بڑھ کر 267 روپے 33 پیسے ریکارڈ کی گئی ہے۔ پیٹرولیم مصنوعات کی نئی قیمتوں کا حتمی فیصلہ آج کیا جائے گا، جس کے لیے اوگرا (OGRA) اپنی سمری حکومت کو بھجوائے گی اور وزیراعظم معاشی ٹیم سے مشاورت کے بعد نوٹیفکیشن کی منظوری دیں گے۔ اس وقت پیٹرول پر فی لیٹر لیوی 80 روپے اور ڈیزل پر 70 روپے 82 پیسے عائد ہے، اور اگر حکومت صارفین کو ریلیف دینے کے لیے اس لیوی میں کمی کرتی ہے تو عوام پر قیمتوں کا اضافی بوجھ ٹل سکتا ہے۔