امریکہ کا بائیڈن دور کی ‘پبلک چارج’ پالیسی ختم کرنے کا فیصلہ؛ تارکینِ وطن کے لیے گرین کارڈ کا حصول مشکل ہونے کا خدشہ

امریکی محکمہ ہوم لینڈ سیکیورٹی اور شہریت و امیگریشن سروسز (USCIS) نے بائیڈن دور کی 2022 کی ‘پبلک چارج’ پالیسی کو ختم کرتے ہوئے ٹرمپ انتظامیہ کے پرانے قوانین کو دوبارہ نافذ کرنے کا اعلان کیا ہے۔ نئے قانون کے تحت اب امیگریشن افسران گرین کارڈ یا ویزا کی درخواستوں کا جائزہ لیتے وقت اس بات پر گہری نظر رکھیں گے کہ آیا کوئی تارکِ وطن سرکاری امداد پر انحصار تو نہیں کر رہا۔ اس سے قبل بائیڈن انتظامیہ نے ان سرکاری فوائد کے دائرہ کار کو محدود کر دیا تھا جنہیں بنیاد بنا کر گرین کارڈ روکا جا سکتا تھا، تاہم اب افسران کو یہ اختیار ہوگا کہ وہ فوڈ اسٹیمپس، میڈیکیڈ، ہاؤسنگ واؤچرز اور دیگر سرکاری معاونت کے استعمال سمیت تمام عوامل کا تفصیلی جائزہ لیں۔ حکام کا کہنا ہے کہ اس اقدام کا مقصد یہ یقینی بنانا ہے کہ امریکہ میں مستقل رہائش کے خواہشمند افراد اپنا بوجھ خود اٹھانے کے قابل ہوں اور وہ حکومتی امداد پر انحصار نہ کریں۔