جے ڈی وینس نے کشنر اور وٹکوف پر مالی فائدہ اٹھانے کے الزامات مسترد کر دیے

امریکی نائب صدر جے ڈی وینس نے ایران کے ساتھ پسِ پردہ مذاکرات میں شریک جیرڈ کشنر اور اسٹیو وٹکوف پر اندرونی معلومات سے مالی فائدہ اٹھانے کے الزامات کو مکمل طور پر مسترد کرتے ہوئے انہیں بے بنیاد قرار دیا ہے۔ سوشل میڈیا پلیٹ فارم “ایکس” پر جاری بیان میں جے ڈی وینس نے کہا کہ یہ الزامات سراسر جھوٹے ہیں اور یہ تصور ہی مضحکہ خیز ہے کہ صدر ٹرمپ کی ٹیم کے یہ قابلِ اعتماد ارکان اپنے اختیارات کا ناجائز فائدہ اٹھا رہے تھے۔ یہ بیان “ڈراپ سائٹ نیوز” کی اس رپورٹ کے بعد سامنے آیا جس میں دعویٰ کیا گیا تھا کہ ایران نے سوئٹزرلینڈ مذاکرات کے دوران جے ڈی وینس کو ایک پیغام بھیجا تھا جس میں کشنر اور وٹکوف کے مالی مفادات کا الزام عائد کیا گیا تھا۔ نائب صدر نے واضح کیا کہ انہیں ایسا کوئی پیغام کبھی موصول نہیں ہوا اور ان دونوں نے خطے میں امن کے لیے سب سے زیادہ کام کیا ہے۔ یہ اہم بیان ایک ایسے وقت میں سامنے آیا ہے جب جے ڈی وینس نے اسرائیلی حکومت کے بعض ارکان پر بھی الزام لگایا ہے کہ وہ غیر ملکی اثر و رسوخ کی مہم کے ذریعے مشرقِ وسطیٰ میں جنگ کے خاتمے کی امریکی کوششوں کو سبوتاژ کرنے کی کوشش کر رہے ہیں۔