امریکی محکمہ خارجہ کی دوہری شہریت رکھنے والے شہریوں کو سفری قوانین پر سختی سے عمل درآمد کی ہدایت

امریکی محکمہ خارجہ کے شعبہ قونصلر افیئرز نے دوہری شہریت رکھنے والے امریکی شہریوں کے لیے ایک اہم سفری ہدایت نامہ (پبلک سروس اناؤنسمنٹ) جاری کیا ہے، جس کے تحت تمام امریکی شہریوں بشمول بچوں اور دوہری شہریت کے حامل افراد کے لیے قانونی طور پر لازمی ہے کہ وہ امریکہ میں داخل ہوتے اور وہاں سے روانہ ہوتے وقت صرف اور صرف اپنے امریکی پاسپورٹ کا استعمال کریں۔ قونصلر افیئرز کے مطابق، دوہری شہریت رکھنے والے امریکی شہری امریکہ سفر کرنے کے لیے اپنے دوسرے ملک کے پاسپورٹ پر الیکٹرانک ٹریول ائتھرائزیشن (ESTA) کے لیے درخواست نہیں دے سکتے، اور ایسے شہریوں کی جانب سے کی گئی درخواستوں کو محکمہ ہوم لینڈ سیکیورٹی (DHS) فوری طور پر مسترد یا منسوخ کر دیتا ہے۔

ہدایت نامے میں بیرون ملک مقیم امریکی شہریوں کو خبردار کیا گیا ہے کہ وہ امریکہ کے سفر کی منصوبہ بندی کرنے سے قبل اپنے پاسپورٹ کی مدتِ معیار (Validity) کو لازمی چیک کریں اور میعاد ختم ہونے کی صورت میں سفر سے پہلے اسے فوری طور پر رینیو کروائیں۔ عام طور پر دوسرے ممالک میں داخلے کے لیے پاسپورٹ کی میعاد کم از کم چھ ماہ ہونا لازمی ہے، اس لیے سفری دستاویزات کو بروقت اپ ڈیٹ رکھنا کسی بھی پریشانی سے بچنے کے لیے ناگزیر ہے۔