افغان سرحدی راستوں سے ہمسایہ ممالک میں منشیات سمگلنگ، تاجک ایجنسی کی رپورٹ جاری

افغانستان میں طالبان رجیم کے تحت منشیات کی اسمگلنگ اور دہشت گرد عناصر کی مبینہ سرپرستی نے خطے کے امن و استحکام کو شدید خطرات سے دوچار کر دیا ہے۔ میڈیا رپورٹ کے مطابق تاجکستان کے انسدادِ منشیات کے ادارے نے ایک تفصیلی رپورٹ جاری کی ہے جس میں انکشاف کیا گیا ہے کہ تاجکستان سے منسلک افغان سرحدی علاقے منشیات کی اسمگلنگ کے اہم ترین راستے بن چکے ہیں۔ تاجک سیکیورٹی فورسز نے رواں سال کے دوران سرحدی علاقوں میں مؤثر کارروائیاں کرتے ہوئے 17 افغان اسمگلرز کو ہلاک جبکہ 18 کو گرفتار کیا ہے۔ گرفتار کیے گئے اسمگلرز کے قبضے سے 601 کلوگرام سے زائد منشیات برآمد کی گئی، جبکہ سال 2026 کے پہلے چھ ماہ کے دوران افغان سرحد پر مجموعی طور پر ایک ٹن اور 513 کلوگرام منشیات ضبط کی جا چکی ہے۔ رپورٹ کے مطابق، افغانستان میں منشیات اور مصنوعی منشیات بنانے والی لیبارٹریاں تاحال مکمل فعال ہیں، جس کا اندازہ اس بات سے لگایا جا سکتا ہے کہ سال 2025 میں افغان سرحد پر 2 ہزار 742 کلوگرام منشیات ضبط کی گئی تھیں جو کہ 2024 کے مقابلے میں 50 فیصد زائد تھیں۔

عالمی ماہرین نے اس تشویشناک صورتحال پر تبصرہ کرتے ہوئے کہا ہے کہ طالبان رجیم نے افغانستان کو عملی طور پر ایک “نارکو ٹیرر ریاست” میں تبدیل کر دیا ہے، جس کا معاشی ڈھانچہ بڑی حد تک منشیات سے حاصل ہونے والی غیر قانونی آمدنی پر منحصر ہے۔ ماہرین کے مطابق، افغان رجیم کی چھتری تلے منشیات کی اسمگلنگ سے حاصل ہونے والا یہ پیسہ جدید ترین ہتھیاروں کی خریداری کے لیے استعمال کیا جاتا ہے، جس کی وجہ سے ہمسایہ ممالک میں دہشت گردی کی کارروائیوں کو فروغ مل رہا ہے اور پورے خطے کی سلامتی داؤ پر لگی ہوئی ہے۔