ایران اب بھی چاہتا ہے ڈیل ہو جائے: وائٹ ہاؤس

امریکی صدارتی محل (وائٹ ہاؤس) کی ترجمان کرولین لیوٹ نے دعویٰ کیا ہے کہ حالیہ کشیدگی کے باوجود ایران اب بھی امریکہ کے ساتھ معاہدہ (ڈیل) کرنے کا خواہش مند ہے۔ غیر ملکی میڈیا رپورٹس کے مطابق، ترجمان نے حالیہ پریس بریفنگ کے دوران بتایا کہ امریکہ نے مفاہمت کی یادداشت کی خلاف ورزی کے جواب میں ایران پر حالیہ حملے کیے ہیں، جس کے بعد تہران اب امریکی حملوں کو روکنے کے قابل نہیں رہا، لیکن اس کے باوجود ایران تاحال امریکہ کے ساتھ رابطے میں ہے۔ کرولین لیوٹ کا کہنا تھا کہ ایرانی قیادت کے درمیان اس وقت واضح تقسیم پائی جاتی ہے، جہاں کچھ رہنما اب بھی امریکہ کے ساتھ معاہدہ کرنے کے حق میں ہیں۔

ترجمان نے واضح کیا کہ امریکی صدر ڈونلڈ ٹرمپ ایران کے معاملے کے سفارتی حل کے لیے بالکل تیار ہیں، تاہم وہ ایران کو بحری جہازوں پر حملے کرنے کی اجازت ہرگز نہیں دیں گے۔ پریس بریفنگ کے دوران ترجمان وائٹ ہاؤس نے ایک اور اہم معلومات کا تبادلہ کرتے ہوئے بتایا کہ صدر ڈونلڈ ٹرمپ فیفا ورلڈ کپ 2026 کے فائنل میچ میں شرکت کے لیے اسٹیڈیم جائیں گے۔