گلگت بلتستان کو عبوری صوبائی حیثیت دینے سے متعلق مشترکہ قرارداد منظور

گلگت بلتستان اسمبلی نے متفقہ طور پر ایک اہم مشترکہ قرارداد منظور کی ہے جس میں وفاقی حکومت سے گلگت بلتستان کو عبوری صوبائی حیثیت دینے کا مطالبہ کیا گیا ہے۔ قرارداد کے متن میں زور دیا گیا ہے کہ ایک آئینی ترمیم کے ذریعے گلگت بلتستان کو عبوری صوبہ بنایا جائے تاکہ یہاں کے عوام کو پاکستان کے دیگر صوبوں کی طرح مساوی آئینی، سیاسی اور جمہوری حقوق حاصل ہو سکیں، اور قومی سطح پر خطے کو مؤثر نمائندگی فراہم کی جائے۔

اسی اجلاس کے دوران، گلگت بلتستان اسمبلی نے پاک فوج کے ساتھ یکجہتی کا اظہار کرنے کی قرارداد بھی کثرتِ رائے سے منظور کی۔ ایوان نے فوج مخالف بیانات کی شدید ترین الفاظ میں مذمت کی اور ملک کے دفاع کی خاطر پاک فوج کے جوانوں اور شہداء کی لازوال قربانیوں کو زبردست خراجِ تحسین پیش کیا۔