یو اے ای: خاتون نے ایک اسٹکی نوٹ پر 150 الفاظ لکھ کر ریکارڈ بنا ڈالا

متحدہ عرب امارات سے تعلق رکھنے والی 29 سالہ خاتون پشپاجوتھی روی کمار نے ایک ہی چھوٹے سے اسٹکی نوٹ (Sticky Note) پر ہاتھ سے 150 مختلف اور واضح الفاظ تحریر کر کے ایک نیا گینیز ورلڈ ریکارڈ اپنے نام کر لیا ہے۔

پشپاجوتھی نے دبئی میں اپنی غیر معمولی اور باریک لکھائی کی مہارت کا بہترین مظاہرہ کرتے ہوئے یہ اعزاز حاصل کیا۔ خاتون کے مطابق وہ بچپن سے ہی گینیز ورلڈ ریکارڈز کی کہانیاں دیکھتی آ رہی تھیں اور ہمیشہ سے اس عالمی کتاب میں اپنا نام درج کروانے کا خواب رکھتی تھیں۔

انہوں نے بتایا کہ ایک دن اچانک انہیں یہ منفرد خیال آیا اور انہوں نے فوری طور پر اس ریکارڈ کا چیلنج قبول کرنے کا فیصلہ کر لیا۔ اس عالمی ریکارڈ کی کوشش کے دوران ان کے سامنے سب سے بڑا چیلنج ایک چھوٹے سے کاغذ کے ٹکڑے پر 150 الفاظ کو اس طرح ترتیب دینا تھا کہ تمام الفاظ بالکل واضح، شفاف اور پڑھنے کے قابل رہیں۔ پشپاجوتھی نے انتہائی احتیاط اور تخلیقی صلاحیتوں کا استعمال کرتے ہوئے اپنی اس گنتی اور جگہ کی تقسیم کو مکمل کیا اور بالاخر گینیز ورلڈ ریکارڈز میں اپنا نام سنہری حروف سے درج کروا لیا۔