ترکیہ کے ساحل کے قریب 2100 سال پرانا جہاز دریافت، مٹی کے برتن برآمد

ترکیہ کے جنوبی ساحلی صوبے انطالیہ کے قریب سمندر کی تہہ میں 2,100 سال پرانے ڈوبے ہوئے ایک قدیم تجارتی بحری جہاز کا ملبہ دریافت ہوا ہے، جس سے نایاب اور تاریخی مٹی کے برتنوں کا بڑا ذخیرہ برآمد کیا گیا ہے۔ ماہرینِ آثارِ قدیمہ کے مطابق سمندر میں تقریباً 55 میٹر کی گہرائی پر موجود اس تاریخی جہاز کے ملبے سے پلیٹیں، پیالے، صراحیاں اور ٹرے سمیت 122 مختلف اقسام کے برتن ملے ہیں، جن میں سے بیشتر دو ہزار سال سے زائد عرصہ گزرنے کے باوجود تقریباً صحیح سلامت ہیں۔

آثارِ قدیمہ کے ماہرین نے انکشاف کیا ہے کہ قدیم دور کے تاجروں نے ان ظروف کو نقل و حمل کے دوران محفوظ رکھنے کے لیے لکڑی کے خصوصی ڈبوں میں رکھ کر ان کے درمیان مٹی بھر دی تھی، جس کی بدولت یہ نایاب نوادرات اتنی طویل مدت تک ٹوٹ پھوٹ سے محفوظ رہے۔ تحقیق کے مطابق یہ بحری جہاز قدیم رومن دور میں بحیرۂ روم کے اہم تجارتی راستے پر سفر کے دوران غرق ہوا تھا۔ زیرِ آب جدید روبوٹک ٹیکنالوجی کی مدد سے ملبے سے مزید تاریخی نوادرات نکالنے اور تحقیقی کھدائی کا عمل جاری ہے۔