بحری جہازوں پر حملوں کے ردعمل میں ایران پر حملےکیے، نتائج سنگین بھی ہوسکتے ہیں۔ را ٹرمپ

امریکی صدر ڈونلڈ ٹرمپ نے ایران کو سخت الفاظ میں خبردار کرتے ہوئے کہا ہے کہ تہران کی جانب سے تجارتی بحری جہازوں پر کیے گئے حملوں کے ردعمل میں ایران پر فوجی حملے کیے گئے ہیں، اور اگر دوبارہ ایسی کوئی کارروائی کی گئی تو اس کے نتائج اس سے کہیں زیادہ سنگین اور برے ہوں گے۔ اپنے سوشل میڈیا پلیٹ فارم ‘ٹروتھ سوشل’ پر جاری کردہ بیان میں امریکی صدر نے واشنگٹن کی جانب سے ایران کے ساتھ کسی بھی ممکنہ مکمل جنگ کے امکان کو مسترد کیا، تاہم انہوں نے یہ  اشارہ ضرور دیا کہ امریکہ ایران کے خارگ جزیرے پر بھی قبضہ کرنے کی مکمل صلاحیت رکھتا ہے۔ اسی دوران امریکی نائب صدر جے ڈی وینس نے بھی واشنگٹن میں ایک نیوز بریفنگ کے دوران تہران کو دھمکی دی ہے کہ اگر ایران نے آبنائے ہرمز کو بند کرنے یا بحری جہازوں پر فائرنگ کا سلسلہ بند نہ کیا تو اسے امریکی فوج کی مسلسل کارروائیوں کا سامنا کرنا پڑے گا، کیونکہ بنیادی معاہدہ یہ تھا کہ تجارتی جہاز رانی کو نشانہ بنانے پر امریکہ بھرپور عسکری جواب دے گا۔

دوسری جانب، امریکی عسکری حکام کے احکامات کے بعد امریکی فوج نے ایران پر اضافی اور تازہ فضائی حملے شروع کر دیے ہیں، جس کا مقصد آبنائے ہرمز سے گزرنے والے تجارتی جہازوں اور ان کے شہری عملے کی حفاظت کو یقینی بنانا اور ایران کی جارحانہ صلاحیتوں کو محدود کرنا ہے۔ ایرانی میڈیا رپورٹس کے مطابق، ان امریکی حملوں کے نتیجے میں ایران کے اہم شہر سرک، چابہار، بندر عباس، کونارک، ایران شہر اور جزیرہ ابو موسیٰ شدید بمباری کی زد میں آئے ہیں۔ چابہار پر ہونے والے امریکی حملے کے باعث ایک پروجیکٹائل (میزائل یا گولے) کا ٹکڑا وہاں موجود امام علی اسپتال پر گرا ہے، جبکہ میری ٹائم ٹریفک کنٹرول ٹاور اور ایک فوجی یا تجارتی ڈپو پر بھی امریکی حملوں اور نقصانات کی اطلاعات موصول ہو رہی ہیں۔ امریکہ اور ایران کے درمیان اس تازہ عسکری تصادم نے عالمی بحری راستوں کی سلامتی کو شدید خطرات میں ڈال دیا ہے