امریکی سپریم کورٹ کے ایکشن پر ٹرمپ کا ری ایکشن، تمام ممالک پر 10 فیصد گلوبل ٹیرف عائد

امریکی صدر ڈونلڈ ٹرمپ نے عدالتی احکامات کو مسترد کرتے ہوئے دنیا بھر سے آنے والی درآمدات پر 10 فیصد گلوبل ٹیرف عائد کرنے کے ایگزیکٹو آرڈر پر دستخط کر دیے ہیں۔ یہ قدم ایک ایسے وقت میں اٹھایا گیا ہے جب امریکی سپریم کورٹ نے حال ہی میں صدر کے ٹیرف بڑھانے کے سابقہ اقدامات کو کالعدم قرار دیا تھا۔

صدر ٹرمپ نے وائٹ ہاؤس میں میڈیا سے گفتگو کرتے ہوئے واضح کیا کہ “تمام ممالک پر نیا ٹیرف فوری طور پر نافذ العمل ہوگا”۔ انہوں نے مزید کہا کہ سابقہ تجارتی معاہدے برقرار رہیں گے، تاہم اب درآمدات پر ٹیکس وصولی کا طریقہ کار مختلف ہوگا۔ صدر ٹرمپ نے سپریم کورٹ کے فیصلے کو “شرمناک” قرار دیتے ہوئے ججز پر کڑی تنقید کی اور الزام عائد کیا کہ کچھ جج ڈیموکریٹس کے زیرِ اثر ہیں اور عدالت غیر ملکی مفادات کے لیے کام کر رہی ہے۔

امریکی نائب صدر جے ڈی وینس نے بھی اس معاملے پر صدر کی بھرپور حمایت کی ہے۔ ان کا کہنا ہے کہ عدالت کا ٹیرف کے خلاف فیصلہ “صاف اور سادہ الفاظ میں قانون شکنی اور لاقانونیت” ہے، جسے تسلیم نہیں کیا جائے گا۔