ایرانی پاسداران کے سینئر عہدیدار کی عرب ممالک کو امریکی فوجی انخلاء کی دھمکی

ایرانی پاسدارانِ انقلاب کے سیاسی نائب جنرل یداللہ جوانی نے عرب ممالک بالخصوص کویت، بحرین اور اردن سے اپنی سرزمین سے امریکی افواج کو فوری نکالنے کا مطالبہ کیا ہے، بصورتِ دیگر شدید فوجی کارروائی سے خبردار کیا ہے۔ خبر رساں ادارے ’تسنیم‘ کے مطابق جنرل یداللہ جوانی نے اپنے بیان میں واضح کیا کہ ایرانی مسلح افواج یہ ثابت کر چکی ہیں کہ وہ ملک کے خلاف استعمال ہونے والے کسی بھی اڈے پر فیصلہ کن حملہ کرنے کی صلاحیت رکھتی ہیں۔ انہوں نے کہا کہ کویت، بحرین اور اردن میں قائم وہ عسکری تنصیبات جہاں سے ایران پر حملے کی کارروائیاں کی جاتی ہیں، ایرانی جوابی حملوں کا براہِ راست نشانہ بن سکتی ہیں۔