اسحاق ڈار کی کرغزستان کے ہم منصب سے ملاقات، دوطرفہ تعلقات بڑھانے پر اتفاق

پاکستان کے وزیر خارجہ اسحاق ڈار نے بشکیک میں اپنے کرغز ہم منصب سے اہم ملاقات کی، جس میں دونوں ممالک کے درمیان دوطرفہ تعلقات کو مضبوط بنانے، تجارت، سرمایہ کاری، توانائی اور علاقائی روابط کے فروغ پر مفصل تبادلہ خیال کیا گیا۔ ترجمان دفتر خارجہ کے مطابق یہ ملاقات وزیراعظم شہباز شریف کی کرغز صدر سے ملاقات سے قبل ہوئی۔ اس موقع پر اسحاق ڈار نے کرغزستان کو شنگھائی تعاون تنظیم (ایس سی او) کی کامیاب صدارت پر مبارکباد دی، جبکہ کرغز وزیر خارجہ نے پاکستان کو ایس سی او کی 2026-27ء کی صدارت سنبھالنے پر مبارکباد پیش کی۔ دونوں رہنماؤں نے کثیرالجہتی فورمز پر باہمی تعاون جاری رکھنے اور خطے میں امن و استحکام کے لیے قریبی رابطہ برقرار رکھنے پر اتفاق کیا۔