کراچی میں گراس روٹ کرکٹ کے فروغ کیلئے ٹاؤن پریمئر لیگ کا آغاز

کراچی شہر میں گراس روٹ کرکٹ کو متحرک کرنے اور مقامی ٹیلنٹ کو سامنے لانے کے لیے ‘ٹاؤن پریمیئر لیگ’ (TPL) کا باقاعدہ آغاز کر دیا گیا ہے۔ لیگ کی افتتاحی تقریب کے مہمانِ خصوصی صوبائی وزیر بلدیات اور لیگ کے پیٹرن انچیف ناصر حسین شاہ تھے۔ سندھ حکومت کے محکمہ بلدیات کے تعاون سے منعقد کی جانے والی اس ٹیپ بال لیگ میں شہر کے تمام 25 ٹاؤنز کی ٹیموں کے علاوہ ایک ٹیم میئر کراچی کی شامل ہے، یوں مجموعی طور پر 26 ٹیمیں میدان میں اتریں گی۔ تقریب کے دوران ٹرافی، آفیشل نغمے، جرسیوں کی رونمائی اور پول ڈرا بھی کیا گیا۔ اس موقع پر ناصر حسین شاہ نے خطاب کرتے ہوئے کہا کہ ٹی پی ایل ایک غیر سیاسی اقدام ہے جس کا مقصد نوجوانوں میں صحت مند مقابلے، اتحاد اور اسپورٹس مین شپ کو فروغ دینا ہے۔ انہوں نے اعلان کیا کہ مستقبل میں اس دائرہ کار کو پورے صوبے تک پھیلانے اور خواتین کی ٹیمیں بنانے کی بھی کوشش کی جائے گی۔