خاتون نے 75 کروڑ کے آن لائن آرڈر کرکے کینسل کردیے، پولیس نے گرفتار کرلیا

ٹوکیو پولیس نے ایک 32 سالہ خاتون کو جاپان کے معروف آن لائن اسٹور پر بڑی تعداد میں جعلی آرڈرز دینے اور بعد ازاں انہیں مسلسل منسوخ کر کے کمپنی کو ہزاروں ڈالرز کا نقصان پہنچانے کے الزام میں گرفتار کر لیا ہے۔ جاپانی میڈیا کے مطابق مایو یوشیڈا نامی اس خاتون نے جعلی ناموں اور تقریباً 230 فرضی اکاؤنٹس کا استعمال کرتے ہوئے معروف اینیمے کمپنی ‘شوئیشا’ کے آن لائن اسٹور پر 2 ہزار سے زائد جعلی آرڈرز دیے۔ خاتون نے ‘ناروٹو’ اور ‘ون پیس’ سمیت مشہور اینیمے سیریز کے کھلونوں اور دیگر سامان کے تقریباً 4.3 بلین ین (2.7 ملین امریکی ڈالر) مالیت کے آرڈرز کیے تھے۔ وہ تمام خریداریاں ‘کیش آن ڈیلیوری’ پر کرتی تھی اور سامان پہنچنے پر ادائیگی سے انکار کر دیتی یا سامان کی روانگی سے قبل ہی آرڈر منسوخ کر دیتی تھی۔ اس حرکت سے کمپنی کو بار بار کورئیر اخراجات کی مد میں تقریباً 47 ہزار 500 امریکی ڈالر کا نقصان اٹھانا پڑا، جس پر پولیس نے کارروائی کرتے ہوئے تحقیقات کا آغاز کر دیا ہے