بریانی کھائیں وہ بھی مفت؛ ریسٹورنٹ کی انوکھی پیشکش

تامل ناڈو: بھارت کی جنوبی ریاست تامل ناڈو میں ایک ریسٹورنٹ نے گیس کی کمی کے باعث اپنے چولہے ٹھنڈے ہونے سے بچانے کے لیے شہریوں کو “کھانا پکانے میں مدد کریں اور بدلے میں کھانا حاصل کریں” کی آفر دے دی ہے۔ ریسٹورنٹ کے باہر لگے پوسٹر کے مطابق، جو شہری ایک کمرشل گیس سلنڈر فراہم کرے گا، اسے پورے مہینے کے لیے مفت بریانی دی جائے گی، جبکہ دو سلنڈر دینے والوں کو روزانہ دو پلیٹ بریانی پیش کی جائے گی۔

ریسٹورنٹ انتظامیہ کا کہنا ہے کہ کمرشل سلنڈرز کی عدم دستیابی نے ان کے کاروبار کو ٹھپ کر دیا تھا، جس کے بعد انہوں نے یہ متبادل راستہ اختیار کیا۔ واضح رہے کہ مشرقِ وسطیٰ میں جاری جنگی کشیدگی اور آبنائے ہرمز (Strait of Hormuz) کے راستے ایل پی جی کی ترسیل میں رکاوٹوں کے باعث بھارت میں گیس کا بحران شدت اختیار کر گیا ہے۔ اس سے قبل اتر پردیش کے شہر میرٹھ کے ایک سرکاری اسپتال سے بھی ایسی ہی ویڈیو سامنے آئی تھی جہاں گیس نہ ہونے کی وجہ سے عارضی چولہوں پر مریضوں کا کھانا تیار کیا جا رہا تھا۔