ٹی20 ورلڈکپ: بھارت اور انگلینڈ دوسرے سیمی فائنل میں آج مدمقابل

ٹی 20 ورلڈکپ 2026 کے دوسرے سیمی فائنل میں آج بھارت اور انگلینڈ ممبئی کے وانکھیڈے سٹیڈیم میں آمنے سامنے ہوں گے، جہاں کانٹے کا مقابلہ متوقع ہے۔

انگلش ٹیم کے آل راؤنڈر ول جیکس امیدوں کا محور ہوں گے، جبکہ بھارت کی جانب سے سنجو سیمسن اپنی صلاحیتوں کے اظہار کے لیے بے تاب نظر آئیں گے۔ بھارت کو ایونٹ میں اب تک صرف ایک میچ میں جنوبی افریقہ کے خلاف شکست کا سامنا کرنا پڑا۔

انگلینڈ نے سپر ایٹ راؤنڈ میں نیوزی لینڈ اور پاکستان جیسے مضبوط حریفوں کو شکست دے کر سیمی فائنل میں جگہ پکی کی۔ انگلینڈ کا اسپن اٹیک بھارت کی مضبوط بیٹنگ لائن کے لیے چیلنج ثابت ہو سکتا ہے۔

دلچسپ بات یہ ہے کہ یہ دونوں ٹیمیں لگاتار تیسری مرتبہ ٹی ٹوئنٹی ورلڈکپ کے سیمی فائنل میں مد مقابل آ رہی ہیں۔ 2022 میں انگلینڈ نے فتح حاصل کی تھی جبکہ 2024 کے سیمی فائنل میں بھارت کامیاب رہا۔ مجموعی طور پر ورلڈکپ میں دونوں ٹیمیں 5 مرتبہ مدمقابل آئی ہیں، جس میں بھارت نے 3 اور انگلینڈ نے 2 بار فتح حاصل کی۔

ٹی 20 فارمیٹ میں بھارت اور انگلینڈ کے درمیان اب تک 29 میچز کھیلے جا چکے ہیں، جن میں سے بھارت نے 17 اور انگلینڈ نے 12 میچز جیتے ہیں۔