سوئیڈن: فٹبال کے شوقین نے انوکھا ریکارڈ بنا ڈالا

سوئیڈن کے شہر لنکوپِنگ میں فٹبال کے شوقین ڈینیئل یعقوب نے ایک نیا گینیز ورلڈ ریکارڈ قائم کیا۔ انہوں نے پیر، گھٹنے، سینہ اور سر کی مدد سے فٹبال کو 28 گھنٹے 21 منٹ اور 2 سیکنڈ تک ہوا میں کنٹرول کیا۔

رائڈشیلن اسپورٹس کمپلیکس میں ہونے والی اس کوشش کے دوران یعقوب کو ہر تین گھنٹے بعد 15 منٹ کا وقفہ دیا گیا۔

اس سے قبل یہ ریکارڈ برطانیہ کے ڈین میگنس کے پاس تھا، جنہوں نے جون 2010 میں 26 گھنٹے تک فٹبال کنٹرول کر کے یہ ریکارڈ بنایا تھا۔

ڈینیئل یعقوب نے گینیز ورلڈ ریکارڈز سے بات کرتے ہوئے کہا کہ یہ ریکارڈ ان کے فٹبال جنون، ذاتی ترقی اور کانٹینٹ تخلیق کا ایک مثالی مجموعہ ہے۔