سلطان آف جوہر کپ میں پاکستان کی فاتحانہ انٹری، چین کو 8-3 سے شکست

پاکستان انڈر 21 جونیئر ہاکی ٹیم نے ملائیشیا میں جاری سلطان آف جوہر کپ ہاکی ٹورنامنٹ میں فاتحانہ آغاز کرتے ہوئے اپنے پہلے میچ میں چین کو 3 کے مقابلے میں 8 گول کے نمایاں فرق سے شکست دے دی ہے۔

میچ کے پہلے ہاف میں چین کی ٹیم نے تین گول کر کے ابتدائی برتری حاصل کر لی تھی، تاہم پاکستانی کھلاڑیوں نے دوسرے ہاف میں زبردست کم بیک کرتے ہوئے حملوں کی بوچھاڑ کر دی اور مقابلے کا پانسہ پلٹ دیا۔ پاکستان کی جانب سے اسام حیدر نے شاندار کھیل کا مظاہرہ کرتے ہوئے 2 گول اسکور کیے، جبکہ محمد فاروق، ولید رانا، فیاض حمزہ، غلام مصطفیٰ، محمد عثمان اور سیف اللہ نے ایک ایک گول کر کے ٹیم کی فتح میں اہم کردار ادا کیا۔

سلطان آف جوہر کپ میں پاکستان، میزبان ملائیشیا، چین، جاپان اور کینیڈا کی جونیئر ٹیمیں مدمقابل ہیں، اور یہ ایونٹ 17 سے 24 اکتوبر تک جاری رہے گا۔ قومی جونیئر ہاکی ٹیم اپنا دوسرا میچ 18 اکتوبر کو کینیڈا کے خلاف کھیلے گی۔ اس ایونٹ کو آئندہ جونیئر ہاکی ورلڈ کپ کی تیاریوں کے حوالے سے انتہائی اہم قرار دیا جا رہا ہے۔