امریکا: دکان سے چرائی گئی کتاب 40 برس بعد لوٹا دی گئی

امریکہ کی ریاست کیلیفورنیا کے شہر یوریکا میں واقع ایک مشہور پرانی کتابوں کی دکان ‘بُک لیگر’ (Book Legger) کو حال ہی میں ایک ایسا پراسرار پارسل موصول ہوا ہے جس نے دکان کے عملے اور سوشل میڈیا صارفین کو حیران کر دیا۔ پارسل میں تقریباً 40 سال قبل چوری کی گئی ایک کتاب کے ساتھ معذرت خواہانہ خط اور 100 امریکی ڈالر بطورِ جرمانہ و معاوضہ موجود تھے۔

کتابوں کی دکان کی انتظامیہ کے مطابق موصول ہونے والے پارسل میں معروف مصنف ایڈورڈ گوری (Edward Gorey) کی کتاب ’دی ان اسٹرَنگ ہارپ‘ (The Unstrung Harp) موجود تھی۔ خط میں بھیجنے والے نے اعتراف کیا کہ وہ تقریباً چار دہائیاں پہلے ہمبولڈٹ اسٹیٹ یونیورسٹی (Humboldt State University) کا طالب علم تھا اور اس زمانے میں منشیات و شراب کی شدید لت کا شکار تھا۔ پیسوں کی ضرورت اور غلط صحبت کے باعث اس نے دکان سے یہ کتاب چرائی تھی۔

خط میں مزید بتایا گیا کہ زندگی میں مثبت تبدیلی اور علاج کے بعد اسے اپنی ماضی کی حرکتوں پر شدید ندامت ہوئی۔ حال ہی میں جب اپنے گھر کے گیراج میں رکھے ایک پرانے ڈبے سے یہ کتاب دوبارہ ملی تو اس کا ضمیر جاگ اٹھا، جس کے بعد اس نے فوری طور پر کتاب معذرت نامے اور 100 ڈالرز کے ساتھ اصل دکان کو واپس بھیج دی۔ دکان کی مالکان نے اس واقعے کو سوشل میڈیا پر شیئر کرتے ہوئے کہا کہ کئی دہائیوں بعد انسان کی سچی ندامت اور دیانت داری کا یہ مظاہرہ ان کے لیے بے حد متاثر کن ہے۔