اسٹیٹ بینک نے بینکاری نظام کے لیے ’’سائبر شیلڈ‘‘ متعارف کرا دی

کراچی: اسٹیٹ بینک آف پاکستان نے بینکاری نظام اور صارفین کے تحفظ کے لیے ’’سائبر شیلڈ‘‘ متعارف کروا دیا۔ یہ اقدام اسٹیٹ بینک کے ویژن 2028ء کے ساتھ ہم آہنگ ہے اور بینکوں و مالی اداروں کو جدید ترین سائبر خطرات سے محفوظ رکھنے کے لیے ڈیزائن کیا گیا ہے۔

سائبر شیلڈ کے تحت عام صارفین اور کاروباری ادارے محفوظ مالی خدمات تک رسائی حاصل کریں گے، جبکہ مالی اداروں کو سائبر شیلڈ کے حوالے سے واضح روڈمیپ فراہم کیا گیا ہے۔

اعلامیہ میں بتایا گیا کہ بینکوں کے ایکو سسٹم کو جدید خطرات کا سامنا ہے اور اس پروجیکٹ کا مقصد سیکورٹی کے نظم و نسق اور احتساب کو بہتر بنانا، مالی شعبے میں باہمی تعاون اور معلومات کے تبادلے کی حوصلہ افزائی کرنا، اور مہارت یافتہ سائبر ٹیلنٹ کی تیاری کرنا ہے۔

اس کے علاوہ، نئے خطرات سے ہم آہنگ ہونے کے لیے سیکورٹی طریقوں کو مسلسل جدید بنایا جائے گا تاکہ پاکستان کے مالی نظام کی مضبوطی اور صارفین کے تحفظ کو یقینی بنایا جا سکے۔