ویمنز ٹی20: سری لنکا ویمنز ٹیم کی پاکستان ویمنز ٹیم کو 6 وکٹوں سے شکست

دمبولا میں کھیلے گئے سیریز کے پہلے ٹی ٹوئنٹی میچ میں سری لنکا ویمنز ٹیم نے پاکستان ویمنز ٹیم کو 6 وکٹوں سے شکست دے دی ہے۔ میچ میں سری لنکا نے ٹاس جیت کر پاکستان کو پہلے بیٹنگ کی دعوت دی، جس پر قومی ٹیم نے مقررہ 20 اوورز میں 7 وکٹوں کے نقصان پر 176 رنز کا مجموعہ ترتیب دیا۔ پاکستان کی جانب سے شوال ذوالفقار 63 رنز بنا کر ٹاپ اسکورر رہیں، جبکہ کپتان منیبہ علی نے 42 رنز کی تیز رفتار اننگز کھیلی۔ سری لنکا کی کویشا دلہاری نے 2 وکٹیں حاصل کیں۔ جواب میں سری لنکن ویمنز ٹیم نے اوپنر ایمیشا دلانی کی 101 رنز کی شاندار ناقابلِ شکست سنچری اور کپتان چماری اتاپتو کے 39 رنز کی بدولت 177 رنز کا ہدف 19 اوورز میں 4 وکٹوں کے نقصان پر حاصل کر لیا۔ پاکستان کی جانب سے نشرہ سندھو نے 2 وکٹیں حاصل کیں۔ اس فتح کے ساتھ ہی ہوم ٹیم کو تین میچز کی سیریز میں 0-1 کی برتری حاصل ہو گئی ہے۔