گھر میں 4 لیٹر پیٹرول ذخیرہ کرنے کے جرم میں شہری گرفتار، قید کی سزا

کٹھمنڈو/کُرونیگالا: سری لنکا میں ایک عجیب و غریب قانونی کارروائی کے نتیجے میں 48 سالہ شہری کو اپنے گھر میں محض 4 لیٹر پیٹرول ذخیرہ کرنے کے جرم میں جیل بھیج دیا گیا ہے۔ غیر ملکی میڈیا کے مطابق، ضلع کُرونیگالا کے علاقے کوبیگانے کے رہائشی اس شخص کو عدالت نے 21 دن قید اور تقریباً 1,500 روپے جرمانے کی سزا سنائی ہے۔ پولیس نے مؤقف اختیار کیا کہ ایندھن ذخیرہ کرنے پر عائد پابندی کے دوران ملزم کو غیر قانونی طور پر پیٹرول رکھنے پر گرفتار کیا گیا۔

شہری پر پیٹرولیم مصنوعات (ریگولیشن اینڈ کنٹرول آف سپلائیز) ایکٹ نمبر 34 آف 1979ء کے تحت مقدمہ درج کیا گیا۔ دورانِ سماعت ملزم کے وکیل نے سخت احتجاج کرتے ہوئے کہا کہ ان کا مؤکل کوئی اسمگلر یا ذخیرہ اندوز نہیں ہے، بلکہ اس نے پیٹرول صرف اپنی گھاس کاٹنے والی مشین (Lawn Mower) میں استعمال کے لیے رکھا تھا۔ وکیلِ صفائی نے عدالت میں یہ نکتہ بھی اٹھایا کہ قانون کے تحت ایک رجسٹرڈ گاڑی کا مالک پیٹرول رکھنے کا مجاز ہے، تاہم قانون میں یہ واضح نہیں کیا گیا کہ کتنی مقدار “قابلِ اجازت” ہے اور کتنی “غیر قانونی”۔

اس فیصلے نے سری لنکا میں نئی بحث کو جنم دیا ہے، جہاں ناقدین کا کہنا ہے کہ اتنی قلیل مقدار پر قید کی سزا دینا غیر منطقی ہے، خاص طور پر جب قانون میں مقدار کی حد واضح نہ ہو۔ دوسری جانب پولیس کا اصرار ہے کہ ایندھن کے بحران اور سپلائی کنٹرول کے پیشِ نظر ایسے اقدامات ضروری ہیں۔ یہ واقعہ سری لنکا میں ایندھن کی قلت اور اس سے جڑے سخت قوانین کی سنگینی کو ظاہر کرتا ہے۔