گلہری نے میٹا کے آفس میں افراتفری مچا دی

تھائی لینڈ کے دارالحکومت بینکاک میں ٹیکنالوجی کمپنی میٹا (فیس بک کی پیرنٹ کمپنی) کے دفتر میں اس وقت افرا تفری مچ گئی جب وہاں آنے والے ایک کورئیر پیکج سے اچانک ایک گلہری نکل آئی۔ غیر ملکی میڈیا کے مطابق، کمپنی کے ایک داخلی میمو سے معلوم ہوا ہے کہ یہ گلہری کچھ دیر تک دفتر کے مختلف حصوں میں آزادانہ گھومتی رہی، جس کے باعث ملازمین میں ہلچل مچ گئی اور اس دوران ایک صفائی کرنے والے ملازم کی انگلی پر گلہری کی وجہ سے معمولی خراش بھی آئی، تاہم بعد میں اسے بحفاظت قابو کر لیا گیا۔ نیویارک ٹائمز کے رپورٹر مائیک آئزک نے سوشل میڈیا پر بتایا کہ اس غیر معمولی اور اچھوتے واقعے نے دفتری ماحول کو یکسر بدل کر رکھ دیا، جہاں ایک ملازم نے مصنوعی ذہانت (AI) کا استعمال کرتے ہوئے گلہری سے بچاؤ اور دفتری احتیاطی تدابیر پر مبنی ایک مزاحیہ ویڈیو بھی بنا ڈالی، جو بالکل ہیومن ریسورس (HR) کی روایتی تربیتی ویڈیوز کی طرز پر ڈیزائن کی گئی تھی۔