پہلا ٹی ٹوئنٹی، پاکستان ویمن ٹیم کو جنوبی افریقہ کے ہاتھوں شکست کا سامنا

تین ٹی ٹوئنٹی میچز کی سیریز کے پہلے میچ میں جنوبی افریقہ ویمن ٹیم نے پاکستان ویمن ٹیم کو 5 وکٹوں سے شکست دے کر سیریز میں برتری حاصل کرلی۔

پوچیفسٹروم میں کھیلے گئے میچ میں پاکستان ویمن ٹیم نے پہلے بیٹنگ کرتے ہوئے مقررہ 20 اوورز میں 9 وکٹوں کے نقصان پر 180 رنز اسکور کیے۔ قومی ٹیم کی کپتان فاطمہ ثناء نے شاندار بیٹنگ کا مظاہرہ کرتے ہوئے 41 گیندوں پر 90 رنز کی جارحانہ اننگز کھیلی۔

جواب میں جنوبی افریقہ ویمن ٹیم نے سنسنی خیز مقابلے کے بعد ہدف میچ کی آخری گیند پر حاصل کرلیا۔ جنوبی افریقہ کی کپتان لاورا وولوارٹ 61 رنز بنا کر نمایاں رہیں، جبکہ کیلا رینیکی کو عمدہ کارکردگی پر پلیئر آف دی میچ قرار دیا گیا۔

اس فتح کے ساتھ ہی تین میچوں کی سیریز میں جنوبی افریقہ ویمن ٹیم کو ایک صفر کی برتری حاصل ہوگئی ہے۔