برمنگھم میں آسمان گلابی ہوگیا، لوگ خوفزدہ، وجہ سامنے آگئی

برطانیہ کے شہر برمنگھم میں رات گئے آسمان کے اچانک گہرے گلابی اور سرخی مائل رنگ میں تبدیل ہونے سے خوف و تجسس کی فضا قائم ہو گئی۔ شدید برف باری کے دوران پیش آنے والے اس غیر معمولی منظر نے شہریوں کو حیران کر دیا، جس پر سوشل میڈیا پر تصاویر، ویڈیوز اور قیاس آرائیوں کی بھرمار ہو گئی۔

ابتدائی طور پر شہریوں نے اسے کسی قدرتی آفت یا غیر معمولی موسمی تبدیلی سے جوڑا، تاہم بعد ازاں ماہرین اور میڈیا رپورٹس نے اس کی اصل وجہ واضح کر دی۔

العربیہ ڈاٹ نیٹ اور برطانوی اخبار میٹرو کے مطابق یہ گلابی روشنی کسی قدرتی مظہر کا نتیجہ نہیں تھی بلکہ برمنگھم سٹی فٹبال کلب کے اسٹیڈیم سے خارج ہونے والی طاقتور ایل ای ڈی لائٹس کی وجہ سے پیدا ہوئی۔ شدید برف باری اور گھنے بادلوں میں موجود ذرات نے ان روشنیوں کو بکھیر دیا، جس کے باعث آسمان پر گلابی رنگ چھا گیا۔

رپورٹس کے مطابق اسٹیڈیم میں یہ خصوصی لائٹس گھاس کی حفاظت اور بحالی کے لیے استعمال کی جاتی ہیں، خاص طور پر خراب موسم کے بعد۔ فضائی اور زمینی تصاویر میں دیکھا گیا کہ اسٹیڈیم کے قریب آسمان کا رنگ زیادہ گہرا تھا، جو فاصلے کے ساتھ مدھم ہوتا گیا۔

ماہرین کا کہنا ہے کہ برف اور بادلوں میں موجود ذرات روشنی کو زیادہ شدت سے منعکس کرتے ہیں، جس کے نتیجے میں زمینی روشنیاں آسمان پر پھیل کر غیر معمولی رنگ اختیار کر لیتی ہیں۔