سنگاپور: خاتون کبوتروں کو دانا ڈالنے کی عادت کیوجہ سے مشکل میں آگئیں، جرمانہ عائد

سنگاپور سے تعلق رکھنے والی ایک بزرگ خاتون جنگلی پرندوں کو دانا ڈالنے کی عادت کے باعث قانونی مشکلات کا شکار ہو گئیں۔

غیر ملکی میڈیا کے مطابق 71 سالہ سانموگامناتھن شملہ پر جنگلی کبوتروں کو بار بار کھانا کھلانے پر 3 ہزار 200 سنگاپورین ڈالر کا جرمانہ عائد کیا گیا۔

میڈیا رپورٹس کے مطابق خاتون پر یہ جرمانہ وائلڈ لائف ایکٹ کی خلاف ورزی پر کیا گیا، جبکہ وہ اس قانون کے تحت عائد چار الزامات میں اعترافِ جرم بھی کر چکی ہیں۔

رپورٹس میں بتایا گیا ہے کہ یہ پہلا موقع نہیں تھا، اس سے قبل بھی ان پر 1200 سنگاپورین ڈالر جرمانہ عائد کیا جا چکا ہے اور انہوں نے عدالت میں دوبارہ خلاف ورزی نہ کرنے کا وعدہ بھی کیا تھا۔

استغاثہ کی جانب سے عدالت میں پیش کیے گئے شواہد کے مطابق خاتون نے جولائی 2025 سے جنوری 2026 کے دوران 9 مختلف مواقع پر کبوتروں کو دانہ اور روٹی کھلائی۔

عدالت میں چلائی گئی ویڈیو فوٹیج میں خاتون کو توا پیوہ کے علاقے میں اپنے فلیٹ کے قریب پرندوں کے جھنڈ میں گھرا ہوا دیکھا گیا۔