کتابیں پڑھنے پر پیسے دینے والا ملک

سنگاپور کی حکومت نے شہریوں میں مطالعے کی عادت کو فروغ دینے اور اسمارٹ فونز پر بڑھتے ہوئے ‘ڈوم اسکرولنگ’ (Doomscrolling) کے منفی رجحان کا مقابلہ کرنے کے لیے ایک منفرد پروگرام کا آغاز کیا ہے۔ اس گیمیفیکیشن (Gamification) پروگرام کے تحت روزانہ کم از کم 15 منٹ کتاب کا مطالعہ کرنے والے افراد کو ورچوئل پوائنٹس دیے جائیں گے، جنہیں بعد میں نقد رقم میں تبدیل کیا جا سکے گا۔ حکومت کے اس جدید اقدام کا بنیادی مقصد سوشل میڈیا اور مسلسل اسکرولنگ کے دور میں شہریوں کی توجہ مرکوز کرنے، تنقیدی سوچ اور تخیلاتی صلاحیتوں کو دوبارہ بحال کرنا ہے۔

اس پروگرام کی تفصیلات کے مطابق روزانہ 15 منٹ یا اس سے زیادہ مطالعہ کرنے پر صارف کو 20 ورچوئل سکے ملیں گے، جبکہ ایک دن میں صرف ایک ہی مطالعہ سیشن شمار ہوگا۔ 1,000 سکے مکمل ہونے پر شہری ایک سنگاپور ڈالر حاصل کر سکیں گے، جس کا مطلب ہے کہ ایک ڈالر کی رقم کے لیے مسلسل 50 دن کے مطالعہ سیشن مکمل کرنا ہوں گے۔

نیشنل لائبریری بورڈ کی سربراہ میلیسا ٹام کے مطابق معلومات، خبروں اور ویڈیوز کی بے پناہ بہتات کے اس دور میں گہرے مطالعے کی پائیدار عادت ہمیشہ چھوٹے اور آسان اہداف سے ہی قائم کی جا سکتی ہے۔ انہوں نے بتایا کہ یہ پروگرام انتہائی سادہ ہدف کے ساتھ شروع کیا گیا ہے تاکہ لوگ بس کے سفر، کھانے کے وقفے یا رات کو سونے سے قبل محض 15 منٹ نکال کر کتاب پڑھنے کی مثبت عادت اپنا سکیں۔ دنیا بھر میں اسمارٹ فونز کے باعث کم ہوتے ہوئے ‘اٹینشن اسپن’ (Attention Span) کے ماحول میں سنگاپور کے اس اقدام کو عالمی سطح پر بے حد سراہا جا رہا ہے۔