چینی بلاگر نے سِم کارڈز سے 16 تولہ سونا حاصل کر کے سب کو حیران کر دیا

دنیا بھر میں سِم کارڈز فون کے لیے استعمال ہوتے ہیں، لیکن چین کے ایک معروف بلاگر نے ان میں موجود چپس اور دیگر برقی آلات سے 191.73 گرام (16.43 تولہ) سونا حاصل کر کے حیرت انگیز کامیابی حاصل کر لی۔

صوبہ گوانگ ڈونگ سے تعلق رکھنے والے بلاگر نے بتایا کہ اس نے اسٹرونگ ایسڈ ڈِسولوشن اور الیکٹرولائٹک ری ڈکشن جیسے پیچیدہ طریقے استعمال کر کے یہ سونا جمع کیا۔ اس کی پاکستانی کرنسی میں مالیت تقریباً 84 لاکھ روپے بنتی ہے۔

بلاگر نے سِم کارڈز اور دیگر مواصلاتی برقی آلات سے سونا نکالنے کی ویڈیو بھی شیئر کی، جو تیزی سے وائرل ہو رہی ہے۔ صارفین حیرت اور دلچسپی کے ساتھ ویڈیو دیکھ رہے ہیں جبکہ کچھ نے طنز و مزاح پر مبنی تبصرے بھی کیے۔

ماہرین کا کہنا ہے کہ حقیقت میں ہر سِم کارڈ میں تقریباً 0.47 ملی گرام سونا ہوتا ہے، لہٰذا بلاگر کا دعویٰ غیر معمولی اور شائقین کے لیے دلچسپ تجربہ سمجھا جا رہا ہے۔