شاہد خان آفریدی سندھ پولیس سپورٹس بورڈ کے ”سفیر کھیل“ مقرر

بین الاقوامی شہرت یافتہ پاکستانی کرکٹ لیجنڈ شاہد خان آفریدی کو سندھ پولیس سپورٹس بورڈ کا ”سفیرِ کھیل“ (Sports Ambassador) تعینات کر دیا گیا ہے۔ اس سلسلے میں سینٹرل پولیس آفس (CPO) کراچی کے محمد علی شاہ آڈیٹوریم میں ایک پروقار تقریب کا انعقاد کیا گیا۔ تقریب میں آئی جی سندھ جاوید عالم اوڈھو، سندھ پولیس سپورٹس بورڈ کے چیئرمین، ڈی آئی جی ٹریفک کراچی، ایس ایس پی میڈیا اینڈ پبلک ریلیشنز، بزنس کمیونٹی کے ممتاز اراکین اور معززین نے شرکت کی۔ تقریب کے دوران شاہد آفریدی کو سفیرِ کھیل کی تقرری کی باقاعدہ سند پیش کی گئی جبکہ آئی جی سندھ اور شاہد آفریدی کے درمیان باہمی شیلڈز کا تبادلہ بھی کیا گیا۔