پاکستان کو عالمی امن کیلئے آگے بڑھتے دیکھ کر فخر ہے: شاہین شاہ آفریدی

قومی ون ڈے ٹیم کے کپتان شاہین شاہ آفریدی نے عالمی امن کے قیام کے لیے پاکستان کے کلیدی کردار پر فخر کا اظہار کرتے ہوئے اسے انسانیت کی بڑی جیت قرار دیا ہے۔ سوشل میڈیا پلیٹ فارم ‘ایکس’ پر جاری اپنے ایک خصوصی پیغام میں شاہین آفریدی کا کہنا تھا کہ وزیراعظم شہباز شریف اور فیلڈ مارشل سید عاصم منیر کو عالمی سطح پر بات چیت اور استحکام پر زور دیتے ہوئے دیکھنا واقعی حوصلہ افزا ہے۔ انہوں نے کہا کہ پاکستان جس طرح عالمی امن کی عظیم تر بھلائی کے لیے آگے بڑھ رہا ہے، اس پر ہر پاکستانی کا سر فخر سے بلند ہے۔

شاہین شاہ آفریدی نے مزید کہا کہ “جنگ بندی ہمیشہ انسانیت کی جیت ہوتی ہے” اور پاکستان اس وقت دنیا میں امید، اتحاد اور دیرپا امن کی راہ ہموار کرنے کے لیے ایک روشن مثال بن کر ابھر رہا ہے۔ قومی کپتان نے اپنے پیغام کا اختتام “پاکستان ہمیشہ زندہ باد” کے نعرے سے کرتے ہوئے اس عزم کا اعادہ کیا کہ ملک کی قیادت کے مثبت اقدامات عالمی سطح پر پاکستان کے وقار میں اضافے کا باعث بن رہے ہیں۔ ان کا یہ بیان ایک ایسے وقت میں سامنے آیا ہے جب پاکستان کی سفارتی کوششوں کو عالمی سطح پر سراہا جا رہا ہے۔