پی ایس ایل: شاہین آفریدی صفر پر آؤٹ ہونے پر غصے میں آگئے، بیٹ توڑ ڈالا

پاکستان سپر لیگ (پی ایس ایل) کے سیزن 11 کے دوران لاہور قلندرز کے کپتان شاہین شاہ آفریدی کے جارحانہ ردِعمل کی ویڈیو سوشل میڈیا پر وائرل ہو گئی ہے، جس میں وہ اپنی کارکردگی سے مایوس ہو کر بیٹ توڑتے نظر آئے۔

نیشنل اسٹیڈیم کراچی میں کوئٹہ گلیڈی ایٹرز کے خلاف کھیلے گئے اہم میچ میں شاہین آفریدی نے بیٹنگ آرڈر میں خود کو آل راؤنڈر سکندر رضا سے پہلے پروموٹ کیا، تاہم ان کا یہ فیصلہ درست ثابت نہ ہوا اور وہ محض دو گیندوں کے مہمان ثابت ہوئے۔ صفر پر آؤٹ ہونے کے بعد جب وہ پویلین کی جانب لوٹے تو غصے پر قابو نہ رکھ سکے اور پہلے اپنا بلا سائیڈ اسکرین کے قریب مارا، پھر ڈریسنگ روم کی سیڑھیاں چڑھتے ہوئے اسے زور سے زمین پر پٹخ دیا جس سے بیٹ ٹوٹ گیا۔

لاہور قلندرز کے لیے رواں سیزن اب تک خاصا مشکل ثابت ہو رہا ہے۔ دفاعی چیمپئن ہونے کے باوجود ٹیم اب تک کھیلے گئے 6 میچوں میں سے صرف 2 میں ہی کامیابی حاصل کر سکی ہے، جس کی وجہ سے کپتان اور ٹیم پر دباؤ واضح طور پر محسوس کیا جا رہا ہے۔