شاہ رخ خان نے دہلی میں اپنا آبائی گھر 37 کروڑ روپے میں خرید لیا

بالی ووڈ سپر اسٹار شاہ رخ خان نے اپنے وسیع رئیل اسٹیٹ پورٹ فولیو میں ایک اور قیمتی اثاثے کا اضافہ کرتے ہوئے نئی دہلی کے پوش علاقے پنچ شیل پارک میں واقع اپنے خاندانی گھر کی مکمل ملکیت حاصل کر لی ہے۔ میڈیا رپورٹس کے مطابق اس بڑے سودے کی مالیت تقریباً 37 کروڑ بھارتی روپے بتائی جا رہی ہے۔ اطلاعات کے مطابق کنگ خان نے رہائشی عمارت کی دوسری اور تیسری منزل خریدی ہے، جس کے بعد اب پوری عمارت خان خاندان کی ملکیت میں آ گئی ہے۔

یہ گھر شاہ رخ خان اور ان کی اہلیہ گوری خان کے لیے گہری جذباتی اہمیت رکھتا ہے کیونکہ ممبئی منتقل ہو کر فلمی کیریئر کا آغاز کرنے سے قبل دونوں اسی گھر میں رہائش پذیر تھے۔ عمارت کا تہہ خانہ (بیسمنٹ) اور گراؤنڈ فلور پہلے ہی خاندان کی ملکیت میں تھے، اور حالیہ خریداری کے بعد پوری جائیداد ایک بار پھر ان کے قبضے میں آ گئی ہے۔ جنوبی دہلی کے مہنگے ترین علاقے میں واقع یہ رہائش گاہ تقریباً 1200 مربع گز (لگ بھگ 10 ہزار 800 مربع فٹ) پر مشتمل ہے، جہاں زمین کی قیمت تقریباً 34 ہزار 260 روپے فی مربع فٹ لگائی گئی ہے۔ رئیل اسٹیٹ ماہرین اس خریداری کو حالیہ برسوں میں دہلی کی نمایاں ترین سیلیبریٹی پراپرٹی ڈیلز میں شامل قرار دے رہے ہیں۔