معاون خصوصی شفیع جان کا طلال چوہدری کے الزامات پر سخت ردعمل

اسلام آباد: معاون خصوصی شفیع جان نے طلال چوہدری کے الزامات پر سخت ردعمل دیتے ہوئے کہا ہے کہ یہ الزامات حقائق کے منافی اور سیاسی بدنیتی پر مبنی ہیں۔

شفیع جان نے کہا کہ سہیل آفریدی کے خلاف منظم پراپیگنڈا مہم چلائی جا رہی ہے اور کبھی افغانستان، کبھی دہشت گردوں سے جوڑنے کی کوشش کی جا رہی ہے۔ انہوں نے الزام لگایا کہ عظمیٰ بخاری، اختیار ولی، طلال چوہدری اور عطا تارڑ کو صوبائی حکومت پر الزام تراشی کے لیے ہائر کیا گیا ہے، اور یہ وہ لوگ ہیں جو عوامی مینڈیٹ کا مذاق اڑا رہے ہیں۔

معاون خصوصی نے مزید کہا کہ فارم 47 کے ذریعے اقتدار میں آنے والوں نے پارلیمان کو ہائی جیک کیا اور عوام کے واضح مینڈیٹ پر حملے برداشت نہیں کیے جائیں گے۔ انہوں نے وفاقی حکومت سے بھی اپیل کی کہ منتخب صوبائی حکومت کے خلاف ہرزہ سرائی بند کی جائے۔

شفیع جان نے کہا کہ خیبرپختونخوا کے ہر ضلع میں دہشت گردوں کے خلاف امن جرگے منعقد کیے گئے، جس میں تمام اسٹیک ہولڈرز بشمول اپوزیشن شریک ہوئے اور پندرہ نکات پر اتفاق کیا گیا۔ صوبائی حکومت نے سی ٹی ڈی اور اسپیشل برانچ کو 31 ارب روپے فراہم کر کے دہشت گردی کے خلاف عملی اقدامات یقینی بنائے، محض بیانات نہیں۔