نوجوان کے معدے سے 7 ٹوتھ برش اور رینچ نکل آئے، ڈاکٹرز حیران

بھارتی میڈیا رپورٹس کے مطابق 26 سالہ نوجوان کو پانچ روز سے شدید پیٹ درد کی شکایت تھی، جس پر اہلِ خانہ نے اسے فوری طور پر اسپتال منتقل کیا۔ مریض کی حالت تشویشناک دیکھتے ہوئے ڈاکٹروں نے مختلف طبی معائنے اور سونوگرافی کروائی، جن کے نتائج نے طبی عملے کو حیران کر دیا۔

رپورٹس کے مطابق سونوگرافی سے انکشاف ہوا کہ نوجوان کے معدے میں کئی سخت اور نوکیلی اشیا موجود ہیں۔ اسپتال کے سینئر سرجن کا کہنا تھا کہ یہ اشیا معدے کی اندرونی دیوار تک پہنچ چکی تھیں اور کسی بھی وقت جان لیوا پیچیدگی کا سبب بن سکتی تھیں۔

صورتحال کی سنگینی کے پیشِ نظر ڈاکٹروں نے فوری طور پر آپریشن کا فیصلہ کیا۔ یہ پیچیدہ سرجری دو گھنٹے سے زائد وقت تک جاری رہی، جس کے دوران نوجوان کے معدے سے 7 ٹوتھ برش اور 2 لوہے کے پانے احتیاط سے نکالے گئے۔

سرجنز کے مطابق اگر آپریشن میں مزید تاخیر ہوتی تو مریض کی جان کو شدید خطرہ لاحق ہو سکتا تھا۔ ڈاکٹروں کا کہنا ہے کہ نوجوان ذہنی مسائل کا شکار ہے اور غیر معمولی طور پر ایسی اشیا نگل لیتا تھا جو کھانے کے قابل نہیں ہوتیں۔

سرجری کے بعد مریض کی حالت بہتر بتائی جا رہی ہے جبکہ اسے مزید علاج کے ساتھ ساتھ نفسیاتی نگرانی میں رکھا گیا ہے۔