بھارت میں سیریل کلر ہاتھی سامنے آ گیا، علاقے میں الرٹ جاری

مشرقی بھارت کی ریاست جھاڑ کھنڈ میں ایک بپھرے ہوئے ہاتھی کے حملوں کے نتیجے میں جنوری کے پہلے 9 دنوں میں کم از کم 20 افراد ہلاک ہوچکے ہیں۔ دو دن ایسے بھی گزرے جن میں یہ ہاتھی 13 افراد کو ایک ساتھ ہلاک کر چکا تھا۔

حکام کے مطابق یہ تنہا نر ہاتھی اپنے جھنڈ سے بچھڑ چکا ہے اور جنگلات سے متصل دیہات میں رات کے وقت حملے کر رہا ہے، جس کی وجہ سے مقامی آبادی شدید خوفزدہ ہے۔

جھاڑ کھنڈ اور ہمسایہ ریاستوں سے تعلق رکھنے والی خصوصی وائلڈ لائف ٹیمیں اسے پکڑنے یا بے ہوش کرنے کے لیے مشترکہ سرچ آپریشن کر رہی ہیں، مگر ہاتھی ریاستی سرحدیں عبور کر کے گھنے جنگلات میں غائب ہو جاتا ہے۔

تازہ ہلاکتیں 12 جنوری کو رپورٹ ہوئیں، جس میں 2 افراد ہلاک ہوئے اور ہاتھی ہمسایہ ریاست اوڈیشہ میں داخل ہو گیا۔ جنگلاتی حکام نے صورتحال کے پیش نظر ہائی الرٹ جاری کر دیا ہے اور ہنگامی ردعمل کے لیے خصوصی ٹاسک فورس قائم کی گئی ہے۔

ماہرین کا کہنا ہے کہ ہاتھی ممکنہ طور پر مست ہے، جو نر ہاتھیوں میں ہارمونز کی ایک قدرتی کیفیت ہے اور اس دوران وہ شدید جارحانہ رویہ اختیار کر لیتے ہیں۔