پرانا عالمی نظام ٹوٹ پھوٹ کا شکار، ایران میں فوری جنگ بندی ضروری ہے: روس

ماسکو: روس کے وزیر خارجہ سرگئی لاوروف نے عالمی سیاست میں جاری کشمکش کو ایک فیصلہ کن موڑ قرار دیتے ہوئے کہا ہے کہ دنیا اس وقت ایک منظم تبدیلی کے بجائے ‘ہمہ جہت ٹوٹ پھوٹ’ کے مرحلے سے گزر رہی ہے۔ روسی انٹرنیشنل افیئرز کونسل سے خطاب میں انہوں نے واضح کیا کہ ایک منصفانہ ‘کثیر القطبی دنیا’ (Multipolar World) کی تشکیل کے لیے جاری مقابلہ اب شدت اختیار کر کے زندگی اور موت کا معاملہ بن چکا ہے۔

لاوروف نے امریکہ اور اسرائیل پر کڑی تنقید کرتے ہوئے مطالبہ کیا کہ ایران کے خلاف جاری فوجی کارروائیاں فوری طور پر بند کی جائیں۔ انہوں نے شہری آبادی اور بنیادی ڈھانچے پر حملوں کو بین الاقوامی قوانین کی کھلی خلاف ورزی اور ناقابلِ قبول قرار دیا۔ روسی وزیر خارجہ کا کہنا تھا کہ واشنگٹن اور تل ابیب دانستہ طور پر ایران اور خلیجی ممالک کے درمیان تعلقات کی بحالی میں رکاوٹیں کھڑی کر رہے ہیں اور مذاکرات کو محض دباؤ کے ہتھکنڈے کے طور پر استعمال کیا جا رہا ہے۔

سرگئی لاوروف نے مغربی ممالک کے ساتھ کشیدہ تعلقات پر بات کرتے ہوئے کہا کہ روس برابری اور باہمی مفادات کی بنیاد پر مذاکرات کے لیے تیار ہے، تاہم وہ کسی کے پیچھے نہیں جائے گا۔ انہوں نے برکس (BRICS) اور شنگھائی تعاون تنظیم (SCO) پر بڑھتے ہوئے مغربی دباؤ کا ذکر کرتے ہوئے کہا کہ روس مشرقِ وسطیٰ میں کشیدگی کم کرنے کے لیے ثالث کا کردار ادا کرنے کے لیے ہمہ وقت تیار ہے تاکہ تنازع کو فوجی راستے سے ہٹا کر سفارت کاری کی طرف لایا جا سکے۔