واٹس ایپ ہیکنگ سے بچاؤ، این سی سی آئی اے کا ایکشن پلان، ہیلپ لائن بھی قائم ہوگی

ڈی جی نیشنل سائبر کرائم انویسٹی گیشن ایجنسی (NCCIA) خرم علی نے پاکستان میں واٹس ایپ اور بینک اکاؤنٹس ہیکنگ کے بڑھتے ہوئے کیسز پر تشویش کا اظہار کرتے ہوئے اس سے نمٹنے کے لیے ایک جامع ایکشن پلان کا اعلان کیا ہے۔ انہوں نے بتایا کہ ہیک شدہ واٹس ایپ اکاؤنٹس کی جلد بحالی میں شہریوں کی رہنمائی کے لیے ایک آن لائن ہیلپ لائن قائم کی جا رہی ہے، جبکہ ‘میٹا’ کے تعاون سے مقامی زبانوں میں عوامی آگاہی مہم بھی شروع کی جائے گی۔ ڈی جی نے شہریوں پر زور دیا کہ وہ اپنے واٹس ایپ پر ٹو اسٹیپ ویریفکیشن لازمی فعال کریں اور اپنا او ٹی پی (OTP) یا کوئی بھی خفیہ کوڈ کسی سے شیئر نہ کریں، کیونکہ او ٹی پی شیئر کرنا ہیکنگ کی سب سے بڑی وجہ ہے۔ انہوں نے مزید بتایا کہ بین الاقوامی اداروں کے تعاون سے پاکستان میں سرگرم کئی سائبر کرائم گینگز کو گرفتار کیا جا چکا ہے اور او ٹی پی کے غلط استعمال کو روکنے کے لیے جدید ٹیکنالوجی پر کام جاری ہے۔