بلھے شاہ ایکسپریس کی بحالی، لاہور ریلوے سٹیشن اپ گریڈ، نئی ٹرینوں کا اعلان

وفاقی وزیر ریلوے حنیف عباسی نے لاہور میں میڈیا سے گفتگو کرتے ہوئے اعلان کیا ہے کہ 15 سال قبل بند ہونے والی ‘بلھے شاہ ایکسپریس’ کا دوبارہ افتتاح کیا جا رہا ہے، جس کا عوام کو بے چینی سے انتظار تھا۔ انہوں نے بتایا کہ ریلوے کو جدید خطوط پر استوار کرنے کے لیے اقدامات جاری ہیں، جس کے تحت لاہور سے واہگہ ٹرین اور راوی ایکسپریس کو بھی رواں ماہ کے آخر تک بحال کر دیا جائے گا۔ حنیف عباسی کے مطابق ریلوے میں 64 نئی کوچز شامل کی جا رہی ہیں اور 43 لوکو موٹیوز کی اوور ہالنگ کر کے انہیں فریٹ آپریشنز کے لیے مختص کیا جائے گا، جس سے ریلوے کی مجموعی استعداد میں 32 فیصد اضافہ ہوگا۔ انہوں نے مزید بتایا کہ وزیراعلیٰ پنجاب مریم نواز نے لاہور ریلوے اسٹیشن کی اپ گریڈیشن کے لیے 2 ارب روپے فراہم کیے ہیں، جبکہ شاہدرہ سے رائے ونڈ منصوبے پر بھی پنجاب حکومت مالی تعاون کرے گی۔ وفاقی وزیر نے حادثات سے بچاؤ کے لیے سندھ اور خیبرپختونخوا کی حکومتوں سے بھی ریلوے کراسنگ گیٹس لگانے کے سلسلے میں رابطے کا ذکر کیا۔