امریکی کارروائی کے دوران کیوبا اور وینزویلا کے سینئر فوجی افسران ہلاک ہوئے، فہرست جاری

غیر ملکی میڈیا کے مطابق کیوبا اور وینزویلا نے گزشتہ ہفتے ہونے والے امریکی حملے کے نتیجے میں ہونے والے جانی نقصان کی تفصیلات جاری کر دی ہیں۔

میڈیا رپورٹس کے مطابق کیوبا کی حکومت نے کراکس میں فوجی کارروائی کے دوران ہلاک ہونے والے 32 اہلکاروں کے نام جاری کیے ہیں۔ سرکاری ویب سائٹ کیوبا ڈیبیٹ میں شائع اعداد و شمار کے مطابق ان میں سے 21 اہلکار وزارتِ داخلہ سے تعلق رکھتے تھے، جن میں 3 اعلیٰ افسران شامل ہیں (دو کرنل اور ایک لیفٹیننٹ کرنل)، جبکہ باقی اہلکار انقلابی مسلح افواج کے رکن تھے، جن میں اکثریت فوجیوں کی تھی۔

دوسری جانب وینزویلا کی فوج نے بھی اپنے 23 فوجی اہلکاروں کی ہلاکت کے نوٹس جاری کیے ہیں۔ ان میں 5 ایڈمرلز، مختلف رینک کے 16 سارجنٹس اور 2 فوجی شامل ہیں۔

ادھر ایک امریکی اخبار کے مطابق امریکی حکام کا اندازہ ہے کہ وینزویلا میں فوجی کارروائی کے دوران مجموعی طور پر تقریباً 75 افراد ہلاک ہوئے۔ رپورٹ میں بتایا گیا ہے کہ زیادہ تر ہلاکتیں کراکس میں صدر مادورو کے کمپاؤنڈ پر شدید فائرنگ اور لڑائی کے دوران ہوئیں۔

واضح رہے کہ امریکا نے ہفتے کے روز وینزویلا پر حملہ کیا تھا، جس کے دوران امریکی ڈیلٹا فورس نے وینزویلا کے صدر نکولس مادورو اور ان کی اہلیہ کو صدارتی محل سے حراست میں لے لیا تھا۔

امریکی صدر ڈونلڈ ٹرمپ کے مطابق مادورو اور ان کی اہلیہ کو ان کے بیڈ روم سے گرفتار کر کے نیویارک منتقل کیا گیا، جہاں ان کے خلاف منشیات اسمگلنگ اور دہشت گردی سے متعلق الزامات کے تحت مقدمات چلائے جائیں گے۔