مذاکرات کے لیے وفد اسلام آبادبھیجنے کاابھی تک فیصلہ نہیں کیا، ایرانی وزارت خارجہ

ایرانی وزارتِ خارجہ کے ترجمان اسماعیل بقائی نےکہاہے کہ ایرانی وفد کے امریکا کے ساتھ مذاکرات کے نئے دور کے لیے اسلام آباد کا سفر کرنے کا ابھی تک فیصلہ نہیں کیا گیا ہے۔

برطانوی نیوزچینل سے گفتگومیں ترجمان نے کہاکہ ایرانی بندرگاہوں کی امریکی ناکہ بندی اور ایرانی بحری جہاز کو قبضے میں لینے کے معاملے پر تشویش ہے۔۔انہوں نے صدر ٹرمپ کی ایران کے بنیادی ڈھانچے کو تباہ کرنے کی دھمکیوں پربھی تشویش کا اظہار کیا۔

اسماعیل بقائی کا کہنا تھا کہ ہم نیک نیتی اور سنجیدگی کے احساس کے ساتھ اس گفت و شنید میں گئے تھے، لیکن مذاکراتی فریق میں سنجیدگی اور نیک نیتی کی کمی ہے، وہ بار بار اپنی پوزیشن تبدیل کر رہے ہیں اور جنگی جرائم کی دھمکیاں دے رہے ہیں۔

اسماعیل بقائی نے یہ نہیں بتایا کہ مذاکرات کی میز پر واپس لانے کے لیے کون سی شرائط پوری کرنا ہوں گی۔ اُن کا کہنا تھا کہ اس پر مشاورت جاری ہے۔