پبلک پرائیویٹ پارٹنرشپ منصوبوں میں تیزی کیلئے نیا نظام منظور

وزیراعظم محمد شہباز شریف کی زیرِ صدارت منعقدہ ایک اعلیٰ سطحی اجلاس میں ملک کے ترقیاتی ڈھانچے کو جدید خطوط پر استوار کرنے کے لیے ایک اہم انتظامی تبدیلی کی منظوری دی گئی ہے۔ وزیراعظم نے پبلک پرائیویٹ پارٹنرشپ (PPP) کے تحت منصوبوں کی رفتار بڑھانے کے لیے پبلک پرائیویٹ پارٹنرشپ اتھارٹی (P3A) کو اب نجکاری ڈویژن کے ماتحت کرنے کا فیصلہ کیا ہے۔ اس اقدام کا مقصد بیوروکریٹک رکاوٹوں کو ختم کرنا اور نجی شعبے کی سرمایہ کاری کو حکومتی ترقیاتی ایجنڈے کے ساتھ زیادہ مؤثر طریقے سے ہم آہنگ کرنا ہے۔

اجلاس کے دوران وزیراعظم نے واضح کیا کہ وزارتوں اور محکموں کی کارکردگی کو اب پبلک پرائیویٹ پارٹنرشپ کے منصوبوں کی بنیاد پر جانچا جائے گا اور اسے ان کے کلیدی کارکردگی کے اشاریوں (KPIs) کا حصہ بنایا جائے گا۔ نئے نظام کے تحت، P3A کی نگرانی براہِ راست کابینہ کمیٹی برائے نجکاری کرے گی، تاکہ شفافیت اور تیز رفتار عملدرآمد کو یقینی بنایا جا سکے۔