ایران-امریکا مذاکرات: ایران کا جواب نہیں آیا، امریکی نائب صدر کا دورہ پاکستان مؤخر

ایران اور امریکا کے درمیان جاری مذاکرات کے دوسرے مرحلے کے تناظر میں امریکا کے نائب صدر جے ڈی وینس کا متوقع دورۂ پاکستان مؤخر کردیا گیا ہے۔

امریکی ذرائع ابلاغ کے مطابق ایران کی جانب سے بروقت جواب نہ ملنے کے باعث دورہ مؤخر کیا گیا۔ معاملے سے باخبر امریکی حکام کا کہنا ہے کہ نائب صدر کا دورہ کسی بھی وقت دوبارہ طے کیا جا سکتا ہے۔

رپورٹس کے مطابق ایران میں دو ہفتوں کی جنگ بندی بدھ کے روز ختم ہونے والی ہے، تاہم یہ تاحال واضح نہیں کہ ایران یا امریکا کی جانب سے آئندہ کیا حکمت عملی اختیار کی جائے گی۔

امریکی میڈیا کا کہنا ہے کہ مذاکرات کسی بھی وقت دوبارہ شروع ہو سکتے ہیں، جبکہ امریکی صدر ڈونلڈ ٹرمپ اس بات کا عندیہ دے چکے ہیں کہ وہ طویل المدتی معاہدے کے بغیر جنگ بندی میں توسیع کے حق میں نہیں۔

دوسری جانب ایران نے تاحال اسلام آباد میں مذاکرات میں شرکت کے لیے کوئی حتمی فیصلہ نہیں کیا۔