مذاکراتی ٹیم سپریم لیڈر مجتبیٰ خامنہ ای کی ہدایات کے مطابق چل رہی ہے: ایران

ایران نے امریکا کے ساتھ جنگ بندی مذاکرات کے دوسرے مرحلے میں شرکت سے تاحال گریز کیا ہے، جس کے باعث امریکی وفد نے پاکستان کا مجوزہ دورہ مؤخر کر دیا ہے۔

عالمی خبر رساں ادارے کے مطابق ایک سینئر سرکاری عہدیدار نے بتایا کہ ایرانی مذاکراتی وفد اپنے تمام فیصلے سپریم لیڈر مجتبیٰ خامنہ ای کی ہدایات کے مطابق کر رہا ہے۔

ایرانی حکومتی روابط کے سینئر اہلکار الیاس حضرتی نے کہا کہ مذاکراتی عمل میں شامل تمام اراکین اجتماعی مشاورت سے فیصلے کرتے ہیں اور ہر قدم سپریم لیڈر کی رہنمائی میں اٹھایا جاتا ہے۔

ان کا کہنا تھا کہ ایران کی ریاستی پالیسی سے متعلق اہم فیصلوں میں سپریم لیڈر کا کردار کلیدی حیثیت رکھتا ہے۔

یہ پیش رفت ایسے وقت میں سامنے آئی ہے جب ایران نے تاحال مذاکرات کے دوسرے دور میں شرکت سے متعلق کوئی حتمی فیصلہ نہیں کیا، جس کے باعث امریکی وفد نے اپنا دورۂ پاکستان مؤخر کر دیا۔

یاد رہے کہ مجتبیٰ خامنہ ای نے مارچ کے اوائل میں منصب سنبھالا تھا، جب 28 فروری کو اسرائیلی حملے میں ان کے والد آیت اللہ علی خامنہ ای کو عسکری قیادت کے ہمراہ قتل کر دیا گیا تھا۔

نئے سپریم لیڈر بننے کے بعد وہ تاحال عوامی سطح پر سامنے نہیں آئے، اور ان کے بیانات تحریری صورت میں جاری کیے جاتے ہیں، جنہیں ذرائع ابلاغ پر پڑھ کر سنایا جاتا ہے۔