دنیا کے امیر ترین بادشاہ کی دولت کا راز: کرایے سے اربوں کا منافع

تھائی لینڈ کے بادشاہ مہا وجیرالونگ کورن، المعروف کنگ رام، دنیا کے امیر ترین بادشاہوں میں سرفہرست سمجھے جاتے ہیں، جن کی دولت کا حجم تقریباً 50 ارب ڈالر بتایا جاتا ہے۔

عالمی رپورٹس کے مطابق کنگ رام کی مجموعی دولت پاکستانی روپوں میں 4.5 لاکھ کروڑ سے زائد بنتی ہے۔ اگرچہ یہ دولت دنیا کے بڑے ارب پتی تاجروں کے برابر نہیں، تاہم ان کے شاہانہ اثاثے اور آمدنی کے ذرائع انہیں دنیا کے امیر ترین شاہی خاندانوں میں نمایاں مقام دیتے ہیں۔

بادشاہ رام کی دولت کا بڑا حصہ کرایے کی آمدنی سے حاصل ہوتا ہے۔ 2018 میں کراؤن پراپرٹی بیورو کا کنٹرول سنبھالنے کے بعد وہ تمام شاہی اثاثوں کے براہِ راست مالک بن گئے، جس سے ان کی مالی حیثیت میں نمایاں اضافہ ہوا۔ ان کے پاس تھائی لینڈ بھر میں ہزاروں قیمتی جائیدادیں ہیں جن میں تجارتی عمارتیں، ہوٹل، محلات اور ریزورٹس شامل ہیں۔

اندازوں کے مطابق کنگ رام تقریباً 6 ہزار 560 ایکڑ اراضی کے مالک ہیں، جس پر 40 ہزار سے زائد جائیدادیں قائم ہیں۔ صرف بنکاک میں ہی 17 ہزار سے زائد پراپرٹیز سے انہیں سالانہ اربوں روپے کرایے کی مد میں آمدن ہوتی ہے۔

کرایے کے علاوہ بادشاہ کی دولت میں بینکنگ اور صنعتی شعبوں کا بھی اہم کردار ہے۔ وہ سیام کمرشل بینک کے لگ بھگ 23 فیصد اور سیام سیمنٹ گروپ کے تقریباً 33 فیصد حصص کے مالک ہیں، جو تھائی معیشت کے بڑے ادارے شمار ہوتے ہیں۔

کنگ رام کے شاہانہ طرزِ زندگی کا اندازہ ان کے نجی اثاثوں سے لگایا جا سکتا ہے۔ ان کے پاس 38 نجی طیارے، متعدد ہیلی کاپٹر، 300 سے زائد لگژری گاڑیاں، 52 سونے کی کشتیوں کے علاوہ قیمتی جواہرات اور زیورات موجود ہیں۔ ماہرین کے مطابق اگر وہ ہر رات ایک مختلف پراپرٹی میں قیام کریں تو انہیں تمام جائیدادیں دیکھنے میں تقریباً 47 سال لگ جائیں گے۔