ایک صدی بعد چیتے کے نقش و نگار والی جنگلی بلی کی نئی نوع دریافت

بولیویا میں محققین نے سائنس کی دنیا میں ایک بڑی اور حیران کن پیشرفت کرتے ہوئے ایک صدی سے زائد عرصے میں پہلی بار جنگلی بلی کی ایک بالکل نئی نوع (Species) دریافت کی ہے۔ چیتے جیسے چتکبرے کوٹ اور محض 45 سینٹی میٹر جسامت والی اس چھوٹی جنگلی بلی کو ‘تلکائیو ٹائیگر کیٹ’ (نامی سائنسی نام Leopardus tlicayo) کا نام دیا گیا ہے، جو بولیویا کے دارالحکومت لاپاز کے قریب یونگاس کے پہاڑی خطے سے دریافت ہوئی ہے۔

نیشنل جیوگرافک کی ایکسپلورر اور بائیولوجسٹ پاولا نوگالیس اسکارونز کے مطابق، 1923ء میں دریافت ہونے والی ‘یوراگوئین پیمپاس کیٹ’ کے بعد گزشتہ 100 سالوں کے دوران جنگلی بلی کی یہ پہلی نئی نوع سامنے آئی ہے۔ بولیویا کے اینڈیز پہاڑی سلسلے کے مقامی لوگ اس نایاب جانور کو عام گھریلو بلی سمجھتے تھے، تاہم 2021ء سے جاری تحقیق اور جدید جینیاتی (Genomic) جانچ کے بعد سائنسی جریدے ‘کرنٹ بائیولوجی’ میں اس کے نئی نوع ہونے کی تصدیق کی گئی ہے۔ فی الحال یہ نایاب مخلوق صرف بولیویا میں ہی دیکھی گئی ہے اور سائنس دانوں نے محدود تعداد کے باعث اسے شدید خطرے سے دوچار مخلوق قرار دینے کی سفارش کی ہے۔