چوہے انسانوں یا دنیا کو کیسے دیکھتے ہیں، سائنسدان کی ریکارڈ کی گئی ویڈیو دیکھیں

سائنسدانوں نے پہلی مرتبہ یہ جاننے میں کامیابی حاصل کر لی ہے کہ چوہے دنیا کو کس طرح دیکھتے اور سمجھتے ہیں۔ اس مقصد کے لیے ماہرین نے چوہوں کی دماغی سرگرمیوں کی بنیاد پر ایک مختصر ویڈیو تیار کی ہے جس سے ان کی بصری دنیا کا اندازہ لگایا جا سکتا ہے۔

یہ تحقیق University College London کے ماہرین نے انجام دی جس میں چوہوں کے دماغی سگنلز کو ریکارڈ کر کے انہیں ویڈیو کی شکل میں تبدیل کیا گیا۔ تیار کی گئی ویڈیوز اگرچہ دھندلی ہیں، تاہم اس سے اندازہ ہوتا ہے کہ چوہے انسانوں کی سرگرمیوں کو دماغی طور پر کس طرح پراسیس کرتے ہیں۔

تحقیق کے دوران چوہوں کو انسانوں کی مختلف سرگرمیوں اور کھیلوں کی ویڈیوز دکھائی گئیں، جس کے بعد ان کی دماغی سرگرمیوں کو ریکارڈ کیا گیا۔ محققین کے مطابق انسانوں سے تو سوال پوچھ کر معلومات حاصل کی جا سکتی ہیں لیکن جانوروں کے ساتھ ایسا ممکن نہیں، اس لیے جدید ٹیکنالوجی کی مدد لی گئی۔

اس مقصد کے لیے Artificial Intelligence پر مبنی ایک پروگرام استعمال کیا گیا جو چوہوں کے دماغ میں ہونے والی برقی سرگرمیوں اور تبدیلیوں کی پیشگوئی کر سکتا ہے۔

محققین نے انفرا ریڈ لیزر کی مدد سے چوہوں کے دماغی نیورونز کا ڈیٹا اکٹھا کیا اور پھر اسے اے آئی پروگرام میں شامل کر کے ویڈیو کی شکل دی۔ سائنسدانوں کے مطابق انسانوں کے مقابلے میں چوہوں کی بینائی کمزور ہوتی ہے، اسی وجہ سے تیار کی گئی ویڈیو دھندلی نظر آتی ہے، تاہم اسے بہتر بنانے کی کوشش کی گئی ہے۔

اس تحقیق کے نتائج سائنسی جریدے eLife میں شائع ہوئے ہیں۔ ماہرین کا کہنا ہے کہ مستقبل میں اس ٹیکنالوجی کے ذریعے جانوروں کی سوچ اور انسانوں کے بارے میں ان کے تصورات کو بہتر طور پر سمجھنے میں مدد مل سکتی ہے