فلم ’شعلے‘ کا منظر حقیقت بن گیا، محبت کی خاطر بسنتی ہائی وولٹیج ٹاور پر چڑھ گئی

بھارتی فلم شعلے کا ایک یادگار منظر نصف صدی بعد حقیقی زندگی میں اس وقت تازہ ہو گیا جب میرٹھ میں ایک لڑکی نے اپنے محبوب سے شادی کے مطالبے پر ہائی وولٹیج بجلی کے ٹاور پر چڑھ کر سب کو حیران کر دیا۔ فرق صرف اتنا تھا کہ فلم میں ویرو بسنتی کے لیے جان جوکھوں میں ڈالتا ہے، جبکہ اس بار بسنتی خود ویرو کو پانے کے لیے خطرہ مول لے بیٹھی۔

بھارتی میڈیا کے مطابق یہ واقعہ میرٹھ میں پیش آیا، جہاں بسنتی نامی لڑکی نے محبت کے اظہار اور شادی کے مطالبے کے لیے بجلی کے اونچے ٹاور پر چڑھ کر ہنگامہ برپا کر دیا۔ اطلاع ملتے ہی پولیس اور ریسکیو ٹیمیں موقع پر پہنچیں اور لڑکی کو نیچے اتارنے کی کوشش کی، تاہم اس نے شرط رکھ دی کہ اگر اس کی شادی ویرو سے نہ کرائی گئی تو وہ اپنی جان دے دے گی۔

کئی گھنٹوں تک پولیس لڑکی کو قائل کرنے میں ناکام رہی۔ بعد ازاں حکمتِ عملی بدلتے ہوئے اس کے محبوب ویرو کو بھی موقع پر بلایا گیا، جس کے بعد حالات قابو میں آئے اور لڑکی کو بحفاظت ٹاور سے نیچے اتار لیا گیا۔

علاقہ ایس ایچ او کے مطابق لڑکا اور لڑکی کی دوستی سوشل میڈیا کے ذریعے ہوئی تھی اور دونوں شادی کے خواہاں ہیں، مگر مختلف برادریوں سے تعلق رکھنے کے باعث خاندانوں کی جانب سے رکاوٹیں سامنے آ رہی ہیں۔ اسی تنازع نے لڑکی کو انتہائی قدم اٹھانے پر مجبور کیا۔

پولیس کا کہنا ہے کہ فی الحال شادی سے متعلق کوئی حتمی فیصلہ نہیں ہوا۔ دونوں خاندانوں کو دورالہ تھانے طلب کر کے بات چیت جاری ہے، جبکہ لڑکی کی کونسلنگ بھی کی جا رہی ہے تاکہ آئندہ ایسے خطرناک اقدامات سے بچا جا سکے۔ یہ واقعہ ایک بار پھر ثابت کرتا ہے کہ فلمی کہانیاں کبھی کبھار حقیقی زندگی میں بھی حیران کن انداز میں دہرائی جا سکتی ہیں۔